မင်္ဂလာပါ
ကုသိုလ်နှင့် Lotus Foundation အဖွဲ့တို့ ပူးပေါင်း၍ ကလေးငယ်များအတွက် ၂၀၁၂-၁၃ ခုနှစ် ပညာရေးထောက်ပံ့မှု အစီအစဉ်ကို ယခုနှစ် ကျောင်းဖွင့်ချိန်မှ စတင်ခဲ့ပါသည်။ လက်ရှိ အဖွဲ့မှ ထောက်ပံ့ပေးနေသော ကျောင်းများမှာ-
- ရွှေပြည်သာ
- လှိုင်သာယာ
- ကွမ်းခြံကုန်း
- ဘိုကလေး
- ဘက သင်ချောင်း
- အ.မ.က တွဲ ကျုံစလူ
- ဘက ကျွန်းနှစ်ပင်
- အ.မ.က သင်ချောင်း
- ဘက ရုပ်ဆိုင်
- တွဲ အ.လ.က ပျဉ်းမကုန်း
- အ.မ.က မူလွန် မရဲရွာသစ်
- အ.မ.က ငြုပ်ကောင်း
- ထခွဲ အောက်လှည်းဆိပ်
- အ.လ.က (ခွဲ) ရုပ်ဆိုင်
- ရာဇူဒိုင်
- မော်ကျွန်း ဘ.က၊ သောင်
- အ.မ.က အထက်ချောင်း
- ကျွန်းခယ်မ
- ဒေးဒရဲ
- ဖျာပုံ၊ အဇုတ်ကြီး
- အ.မ.က အောက်ကွင်း (၂)
- အ.မ.က မူလွန် အောက်ကွင်း (၁)
- အ.မ.က စံပြ အောက်ကွင်း
- အ.မ.က မူလွန် မှော်ဘီ
- အ.မ.က ထိန်တပင်
- ပေါင်းတလည် ပြည် တို့ဖြစ်ပါတယ်။ ထိုကျောင်းများ တည်ရှိရာ မြို့များကတော့ ရွှေပြည်သာ၊ လှိုင်သာယာ၊ ကွမ်းခြံကုန်း၊ ဘိုကလေး၊ မော်ကျွန်း၊ ဒေးဒရဲ၊ ဖျာပုံ နှင့် ပေါင်းတလည် ပြည် တို့ ဖြစ်ကြပါတယ်။
ထိုကျောင်းများရှိ မူလတန်း အလယ်တန်း နှင့် အထက်တန်း ကလေးစုစုပေါင်း (၅၀၄) ယောက်အတွက် အလှူငွေများကို ဇွန်လမှ စတင်ကောက်ခံခဲ့ပါသည်။ အလှူငွေများကို ၂လတကြိမ် ကောက်ခံခဲ့ပြီး ပုံမှန်အားဖြင့် ဇွန်၊ သြဂုတ်၊ အောက်တိုဘာ နှင့် ဒီဇင်ဘာလများတွင် ရန်ကုန်ရှိ Lotus Foundation အဖွဲ့က မောင်နှမများက သက်ဆိုင်ရာ ကျောင်းများသို့ သွားရောက် ကူညီ ပို့ဆောင်ပေးပါသည်။
ပထမအကြိမ်အဖြစ် ကလေးများအတွက် အလှူငွေကို ဇွန်/ဇူလိုင်လတွင် လွှဲပို့ပေးခဲ့ပြီး ဒုတိယအကြိမ်အဖြစ် သြဂုတ်လတွင် ထပ်မံ လွှဲပို့ပေးခဲ့ပါသည်။
အလှူရှင်စာရင်းနှင့် ကျောင်းသားစာရင်းများကို ဖြည့်စွက်သည့်အခါတွင် အချို့ ဖြည့်စွက်စရာများ ကျန်ရှိနေသေးမှုကြောင့် အလှူရှင်များထံသို့ ပေးပို့အကြောင်းကြားမှု မပြုလုပ်နိုင်သေးသည့်အတွက် နားလည်ခွင့်လွှတ်ပေးပါရန် တောင်းပန်လိုပါသည်။ စာရင်းများကို အမြန်ဆုံး အတည်ပြုပေးပြီး ပေးပို့ပေးပါမည့်အကြောင်းလည်း အသိပေးလိုပါသည်။
စာရင်းမတည်ငြိမ်ရသေးခြင်းအကြောင်းကိုလည်း အနည်းငယ် ရှင်းပြလိုပါသည်။
နာဂစ်ဖြစ်ပြီးနောက်ပိုင်း ၂၀၀၈ခုနှစ်မှ စ၍ အဖွဲ့မှ ကလေးများကို စတင်ထောက်ပံ့ခဲ့ပါသည်။ အစဦးဆုံး စာရင်းများတွင် ကလေးများသည် မိခင်မရှိ (သို့မဟုတ်) ဖခင်မရှိ (သို့မဟုတ်) နှစ်ဦးစလုံး မရှိကြသည်က များပါသည်။ နောက်တနှစ် စာရင်းတွင် အရင်နှစ်က မိဘမရှိသော ကလေးများ၏ မိဘများ ပြန်လည် ပေါ်လာတတ်ပါသည်။ အဘယ်ကြောင့်ဆိုသော် .. အစဦးဆုံး ထောက်ပံ့ခဲ့ချိန်တွင် ကလေးများသည် မိဘနှင့် ကွဲကွာနေပြီ မိဘများ သေဆုံးပြီဟု မှတ်ယူ၍သော်လည်းကောင်း တချို့ကတော့ မိဘ ရှိသည်ဟု သိရှိပါက ထောက်ပံ့ကြေးငွေ မရရှိမှာစိုးသည့် အဖြစ်များကြောင့် ဖြစ်ပါသည်။ (ကလေးများ၏ မိသားစုများသည် အတော်လေး ချို့တဲ့သည်ကတော့ အမှန်ပင်ဖြစ်ပါသည်။)
နောက်ထပ် ဖြစ်တတ်သည်ကတော့ .. အစဦးဆုံးနှစ်တွင် ကလေးတယောက်သည် ဖခင်ရှိပြီး မိခင် သေဆုံးဟု စာရင်းပေးခဲ့ပါသည်။ နောက်တနှစ်တွင်တော့ မိခင် ပြန်ပေါ်လာပါသည်။ အကြောင်းမှာ ဖခင် နောက်အိမ်ထောင် ပြုလိုက်သောကြောင့် ဖြစ်ပါသည်။
ကလေးတယောက် စာမေးပွဲကျခြင်း၊ ကျောင်းထွက်ခြင်းကြောင့် နောက်ကလေးတဦး အစားထိုးသည့် အခါများလည်း ရှိပါသည်။ ထိုအခါများတွင်လည်း မြန်မာပြည်ဘက်မှ ဖြည့်စွက်စာရင်းများကို စောင့်ဆိုင်းပြီး အလှူရှင်များအတွက် စာရင်းကို ပြင်ဆင် ဖြည့်စွက် ပေးရပါသည်။ စသည့် အကြောင်းကြောင်းကြောင့် စာရင်းများကို နှစ်စမှစ၍ မပေးနိုင်သည်ကို နားလည်ခွင့်လွှတ်ပေးစေချင်ပါသည်။
တတိယအကြိမ်အဖြစ် အလှူငွေများကို စက်တင်ဘာလ နောက်ဆုံးပတ်လောက် တွင် ပြန်လည်ကောက်ခံ ပါမည့်အကြောင်းနှင့် မြန်မာနိုင်ငံဘက်သို့ အောက်တိုဘလဆန်းတွင် ပေးပို့ဖို့ စီစဉ်ထားပါသည့်အကြောင်း အကြောင်းကြားအပ်ပါသည်။
မေတ္တာရှင် အလှူရှင်များအားလုံး ကိုယ်စိတ်နှစ်ဖြာ ကျန်းမာ ချမ်းသာကြပါစေ ..
No comments:
Post a Comment